Bonggang Graduation gidili

CEBU, Philippines - Gipahimangnuan na usab sa Hunta Probinsiyal ang mga magtutudlo ug mga prinsipal sa mga tunghaan nga dili magpasulabi sa ilang gastohan sa graduation sa mga tinun-an karong sunod bulan.

Sumala pa ni provincial board member Juan Bolo nga dili kinahanglang pangayuan og dakong alamotan ang mga ginikanan sa mga mogradwar nga mga estudyante tungod sa kaapiki sa kwarta sa katawhan karon nunot sa nasinating global crisis sa tibuok nasud.

Ang maong pahimangno nagsuporta usab sa gipagawas nga kamandaun ni Education Secretary Jesli Lapus nga giisyu niadtong Pebrero 18 ning tuiga nga dili mangayo og alamotan, pagpasul-ob og mahalon nga biste ug himuong simple ang graduation ceremony.

Ang provincial board nibaod sa estilo karon sa ubang tunghaan nga gamiton ang Parents Teachers and Community Association aron maoy pakolektahon sa alamotan aron makalingkawas ang mga magtutudlo sa kamanduan.

Sa samtang kamanduan, ang kalihim nimando usab sa mga prinsipal nga ang graduation rites sa tulunghaan ra gyud ipahigayon ug dili angayan nga himuon nga tapukanan sa mga politiko.

Kini nagpasabot ang mga prinsipal ug mga school heads dili mangimbitar og mga lokal nga mga politiko ilabi na kun ang katuyoan pamolitika lang. - Chester Abadilla (BANAT NEWS)