Bikini open ban gyud sa city

CEBU, Philippines - Pabiling gi-ban o gidili dinhi sa dakbayan sa Sugbu ang pagpahigayon og bisan unsang matang sa “bikini open contest” matud sa chairman sa Cebu City Anti-Indecency Board (CAIB) nga si Dr. Rene Josef Bullecer nga nahinabi sa Banat News.

Si Bullecer nagkanayon mag-unom na ka tuig nga gidid-an sa CAIB ang pagpapahigayon og susama niining mga pasundayag sa siyudad.

“Ato gyud nang gi-ban kay lisod na man gud ni natong mapugngan kung masugdan na, unya sometimes they go overboard sa gilatid nga guidelines sa CAIB ba,” sumala ni Bullecer.

Nagtuo si Bullecer daghan ang paagi sa pagdani sa mga lokal ug langyaw’ng mga turista ug dili lang sa pagpahigayon og bikini open.

Mitumaw ang kontrobersiya sa maong matang sa kalihukan human sa gipahigayong bikini open sa dakbayan sa Lapu-Lapu niadtong miaging semana.

Kini dihang usa ka Fil-Norwegian contestant ang gikatahong nakaligo og gas inay tubig atol sa ‘wet and wild portion’ dihang nasaypan nga tubig ang gas nga gisulod sa botelya.

Wala hinuon makaangkon og dakong kadaut sa iyang lawas si Sandra Reppi, 18 anyos, apan kini gikataho nga nadala gyud sa tambalanan.

Ang bikini open sagad ipahigayon sa mga organizers niining panahuna nga naghinangat na ang summer.   (Elly Bolonos) (BANAT NEWS)