Drugtest sa mga tinun-an padayon

CEBU, Philippines - Ipadayon karong adlawa ang kinalit nga drugtest sa mga tinun-an sa nagkadaiyang mga tunghaan sa dakbayan sa Sugbu sumala pa sa education supervisor sa Cebu City Schools Division nga si Cipriano Balili dihang nahinabi sa Banat News.

Ang mga tinun-an sa Bethany Christian School; Saint Paul Learning Center ug Ramon Duterte Memorial National High School maoy ipaubos karon sa random drugtest.

Matud pa ni Balili nga niadto pang miaging adlaw gisugdan sa Department of Education (DepEd) ang kinalit nga drugtest sa mga tinun-an dinhi sa dakbayan.

Unang gipaubos sa DepEd sa random drugtest mao ang mga tinun-an sa National Science High School diha sa barangay Labangon.

Kagahapong adlawa, ang mga tinun-an usab sa lima ka publiko ug pribadong mga tunghaan sa dakbayan ang gipaubos sa kinalit nga drug test.

Kini mao ang mga tinun-an sa Abellana National School; Don Sergio Osmeña Sr. Memorial National High School; Saint Mary’s Academy; Don Carlos A. Gothong Memorial National High School ug Cebu Eastern College.

Gipadayag hinuon ni Balili nga ang ilang pagpili sa maong mga tunghaan nga maoy unahon sa pagpa-drugtest wala magpasabot nga sila nagduda sa mga tinun-an niini.

Gitataw sa education supervisor nga ang tanan gyud nga public ug private high school dinhi sa siyudad ang ipaubos sa random drugtest.

Ang maong kalihukan gipahaom sa kamanduan ni presidente Gloria Macapagal Arroyo subay usab sa paghingusog sa kampanya sa gobiyerno batok sa ginadiling drugas. (Elly Bolonos)   (BANAT NEWS)