Drayber Milayat, Naligsan

CEBU, Philippines - Napigsat ang lawas ug ulo sa usa ka drayber human kini moambak sa trak de kargang iyang gimaneho nga nawad-an og preno aron unta maluwas apan naligsan na hinuon kini sa iyang trak diha sa dulhogong bahin sa sitio Campatok barangay Dalid, lungsod sa Tabuelan niadtong Miyerkules sa alas 6:00 sa gabii.

Ang drayber sa Isuzu cargo truck nga namatay mao si Rene Bedlan, lumad nga taga barangay Babag La Carlota Negros Oriental samtang naangol ang helper niining si Eden Jimena, 20, nagpuyo gihapon sa maong lugar.

Matud pa ni Insp. Rogelio Amoroso Jr, hepe sa Tabuelan police dihang nahinabi sa Banat News subay sa gihimong pagsukit-sukit niini ngadto sa truckboy nga naangol gikan sila sa siyudad sa Sugbo nangompra og mga feeds ug paingon na unta sa Tabuelan wharf aron mosakay og lantsa paingon sa Negros.

Pag-abot nila sa dulhugong bahin sa maong lugar nawad-an og preno ang ilang trak hinungdan nga nakahukom ang drayber nga ibangga kini sa pangpang sa walang bahin aron pagsiguro nga dili sila matagak sa bung-aw sa pikas bahin sa karsada.

Apan dihang mibangga na ang trak wala gyud kini mohunong sa pagdagan ang maong trak hinungdan nga miambak nalang sa bintana ang drayber apan pagtugpa niini napasok kini sa ilawom ug nalatayan gyud sa duha ka mga ligid sa atras nga bahin.

Samtang ang helper nakaangkon lang kini og mga pangos-pangos sa lawas kinsa tungod sa kahadlok wala nalang moambak ug miuban nalang sa pagdausdos sa trak paubos hangtud nga kini hingpit nga mihunong og dagan sa ubos nga bahin.

Matud ni Insp. Amoroso maayung pagkapigsat sa lawas ug ulo sa biktima human malatayi sa duha ka mga ligid sa sakyanan nga puno sa karga nga feeds

Ang maong trak de karga gipanag-iya sa Tri Star Trucking Corporation nga nagbase sa Cadiz City.   (BANAT NEWS)