Police Regional Office-7 di gusto'g operational lapses

CEBU, Philippines - Nunot sa mga kapalpakan sa kapolisan sa ilang mga operasyon, ang acting Police Regional Office (PRO-7) Chief Supt. Federico Terte nanawagan sa iyang mga sakop nga ipatuman gyud ang Police Operational Procedures sa ilang pagdakop sa mga kriminal.

Si Terte di buot nga mahitabo dinhi sa rehiyon ang nahitabo sa kapulisan sa Quezon City Police District nga karon nangasuspenso samtang giimbestigar sa Commission on Human Rights (CHR) human gipauwanan og bala ug napatay ang tulo ka gituohang mga tulisan pipila na ka adlaw ang nakalabay.

Matud pa niini nga angayan gyud sundon ang Police Operational Procedures sa tanang operasyon aron walay kalapasang mahimo.

Gipadayag niini nga gikinahanglan gyud nga isil-sil sa alimpatakan sa tanang polis ang maong proseso tungod kay dinhi kanunay magsugod ang mga kalapasan nga mao usab ang sagad hinungdan nga ang ilang madakpan makalingkawas na hinuon sa kasong giatubang samtang ang mga polis mao nay nameligrong mangataktak sa serbisyo. (Guam Logroño)    (BANAT NEWS)