Placement agency padayon sa operasyon

CEBU, Philippines - Bisan dunay kasong nag-ungot sa korte ang Be Glad Worldwide Placement Agency gitugotan gihapon sa Philippine Overseas Employment Administration (POEA) nga makapadayon sa ilang operasyon.

Kahinumduman nga ang maong ahensya maoy responsable sa 23 ka Overseas Filipino Workers (OFW) paingon didto sa Trinidad and Tobago sa milabay’ng tuig apan nangapriso gumikan kay giingong kuwestiyonable ang ilang papeles.

Si Kongresista Ramon “Red” Durano sa kinto distrito sa lalawigan nibutyag sa press conference kagahapon nga nagsugod na sa miaging adlaw ang deleberasyon sa gihimong imbestigasyon sa 23 ka OFW didto sa hawanan sa Kongreso.

Ang 23 ka OFWs nakabalik na dinhi sa Pilipinas human migasto ang lalawigan, 14 kanila pulos nagagikan sa Isla sa Camotes.

Si Durano kinsa maoy niduso og resolusyon sa Kongreso pag-awhag nga paimbestigahan ang nahitabo mikwestyon nganong nakabalik sa ilang operasyon ang maong recruitment agency.

Si Jacquiline Fortuna nga taga Mandaue City kinsa apil sa 23 ka OFWs miingon nga ang ilang kaso anaa na sa National Labor Relation Commission (NLRC) nga nagdemandang ilang pabayron og P600,000 matag usa ang kumpanya kanila.

Gitataw ni Durano nagpasa-pasa nalang ang mga ahensya sa POEA, OWWA, DOLE ug immigration kung si kinsa kanila ang sad-an.

 “Gusto sa grupo (23 OFWs) nga masirad-an ang Be Glad apan ipaagi man gyud og saktong proseso,” matud ni Fortuna.

Si Ruberto Gubalane taga San Francisco miingon nga atol sa ilang husay niadtong Enero 27 sa POEA-7 didto nila nahibaw-ang nakabalik na sa operasyon ang maong recruitment agency.

Nabalaka sila nga mapriso’g usab tungod sa ilang dakong utang sa lending diin matag usa kanila nangutang sa dili mominos P70 mil aron lang makalarga apan tungod sa pagtabang ni Durano kanila nawagtang ang ilang kabalaka.   (Rey Pasaporte)    (BANAT NEWS)