CEBU, Philippines - Inihap na lang karon ang mga adlaw sa mga stallholders diha sa nagkadaiyang merkado publiko sa dakbayan sa Sugbu nga napakyas pag-renew sa ilang kontrata.
Kini tungod kay ang giabangan niini nga mga stalls ideklarar unya sa Market Authority nga bakante ug papahawaon ang mga okupante.
Matud ni City Market Administrator Racquel Bohol-Arce nga nagpadayon karon ang ilang pagpang-renew sa contract of lease diha sa mga satellite market sa siyudad.
Gipahibawo ni Arce nga sa pito ka mga merkado publiko nga ila nang naduaw, dunay pipila ka mga stallholders nga wala maka-renew sa kontrata.
Kini tungod kay ang uban wala na maninda samtang dunay mga pwesto usab nga giingong gipamaligya o gipaabangan sa laing vendors.
Ang maong paagi gihulagway sa market administrator nga usa ka kalapasan sa market code sa dakbayan nga maoy ilang gitamdan.
“Kun dili ka maka-renew sa ato pa wala na silay personality diha sa merkado, ato gyud nang ideklarar nga vacant ang stalls,” sumala ni Arce.
Nagkanayon ang market administrator nga kadtong mga stalls nga madeklarar nga bakante ilang ipasubasta ngadto sa interesado usab nga mga vendors. (Elly Bolonos) (BANAT NEWS)