Barkong 1,000 gross tonnage larga bisan bagyo

CEBU, Philippines - Ang Philippine Coast Guard motugot na nga makalawig ang mga barkong may gibug-atong 1,000 gross tonnage pataas bisan og may bagyo ug moisa ang Pag-asa og public storm signal number 1.

Si Cebu Coast Guard district chief of staff ug spokesperson commander Anelito Cabisan nagkanayon nga ang bag-o nilang patakaran gipasubay sa nadawat nilang memorandum circular no. 0109 nga naghatag kanila og gahum sa pagtugot nga makalarga ang mga dagkong barko bisan og may bagyo.

Apan gitataw hinuon sa maong kamanduan nga sa higayon nga makasugat ang mga dagkong barko gikinahanglan nga motago una kini sa mga isla ug dili una mopadayon sa ilang destinasyon.

Giklaro ni Cabisan nga ang maong bag-ong kamanduan nag-usab sa kamanduan nga giluwatan ni Presidente Gloria Macapagl Arroyo nga walay bisan usa nga barko, madako man o magamay bisan og signal number 1 nga palargahon.

Kini gumikan sa nahitabong trahedya sa pagkalunod sa MV Princess of the Star sa Sulpicio Lines Inc. sa Romblon nga mikalas og kapin 700 ka tawo.

Matud pa ni Cabisan ang maong memorandum circular gitawag nga Guidelines on Movement of Vessels during Heavy Weather, gipirmahan ni Vice Admiral Wilfredo Tamayo ang commandant sa Philippine Coast Guard.

Gisugdan kini pagpatuman niadtong Pebrero 21 ning tuiga.   (BANAT NEWS)