Cebuano midaog sa 6/49 lotto

CEBU, Philippines - Usa ka Sugboanon gikatahong usa na ka multi-millionaire karon nga makigbahin sa P347,836, 903.20 milyones nga premyo sa 6/49 lotto jackpot niadtong Domingo sa gabii nga may kombinasyong 06-34-20-26-12-33.

Ang Philippine Charity Sweepstakes Office (PCSO) sa sayo pa mibutyag nga duha ka tawo ang magbahin sa maong premyo nga pulos taga Luzon, ug sukad pa niadtong adlaw'ng Martes wala pa kuhaa sa ikaduhang mananaog ang katunga nga P173 milyones.

Sa miaging adlaw, nabaniog sa pundok sa mga taxi drayber nga usa ka taxi drayber ilang mga kaubang lumad nga taga amihanang bahin sa lalawigan ang palarang midaog sa maong draw.

Base sa kasaligang tinubdan sa Banat News ang ikaduhang mananaog didto makapalit og tiket sa kauluhan niadtong adlaw'ng Domingo sa buntag una pa siya molarga balik dinhi sa Sugbu nianang pagkagabii.

Ang maong drayber (pangalan ug address gipugngan sa Banat News alang sa iyang seguridad) niadtong adlaw lang nga Martes nakahibalong midaog ang iyang kombinasyon human siya ug kaubang mga drayber naniudto sa usa ka kan-anan diha sa barangay Zapatera.

Nagpangutana kini kabahin sa pamaagi sa pagdaog sa lotto tungod kay mitakdo ang iyang tiket sa migawas nga resulta apan nagkarambola ang kombinasyon niini maong di siya sigurado kun midaog ba siya.

Gikatahong usa sa iyang mga kaubang drayber miduol ug mipakita og newspaper nga diin napatik ang winning combination sa draw niadtong adlaw’ng Domingo ug sa dihang ilang gitandi nakugang ang miduol nga drayber nga pulos mitakdo ang numero apan wala lang magsunod.

Ang taxi drayber dihang gisultihang midaog bisan wala magsunod ang numero giingong wala motiwas sa iyang gikaong “dugo-dugo”niadtong higayona ug daling misakay sa iyang taxi ug mibiya.

Gikatahong ang tindera sa karenderyang gikan-an sa drayber hapit makuyapi human masayring nakadaog ang iyang suking drayber.

Mitug-an ang maong taxi drayber nga sa wala pa siya molarga paingon dinhi sa Sugbu, nipalit siya og lotto didto sa kauluhan nianang buntag sa adlaw'ng Domingo sa wala pa siya mosakay og barko paingon dinhi sa Sugbu.

Matud niini nga wala gyud siya masayod kung ang numero nga magka ‘tuad-tuali’ diay mahimo gihapong makadaog, apan namatikdan nga daw nanigurado nang daan ang maong drayber nga di maguba ang iyang tiket sanglit xerox copy nalang ang iyang gipakita sa iyang mga higala.

Ang PCSO-7 sa dihang gikuhaan og reaksyon sa Banat News kagahapon nagkanayon nga dili na sila makahibawo kun dunay makadaog sa jackpot dinhi sa Kabisay-an sanglit dili na moagi kanila ang mga mananaog ug adto nalang modiretso sa ilang uluhang buhatan.

Niadtong adlaw'ng Lunes, gikuha na sa usa ka 50-anyos nga ginang ang P173.9 milyones nga premyo sa lotto sa kauluhan. Sumala pa sa PCSO –Manila, ang ikaduhang midaog nga tiket diha mapalit sa usa ka lotto outlet sa Guillermo Ave. sa barangay Buting sa Pasig City. (BANAT NEWS)