Konsehal gikiha'g graft

CEBU, Philippines -  Gipasakaan og reklamo ngadto sa Ombudsman Visayas ang kanhi barangay kapitan sa Punta Princesa ning siyudad sa Sugbu ug karon konsehal na sa maong barangay nga si Jose Navarro.

Ang mireklamo ni Navarro ngadto sa anti-graft office mao ra usab ang iyang kaubang konsehal sa Punta Princesa nga si Manilyn Mar-Mier.

Kalapasan sa Anti-Graft and Corrupt Practices Act ug Code of Conduct and Ethical Standards ang giduso nga reklamo batok kang Navarro.

Lakip na usab niini ang kalapasan sa Section 335 sa Local Government Code nga nagdili paggamit sa public funds alang sa pribadong katuyoan.

Ang reklamo ni Mar-Mier nagsukad sa katukuran sa Aqua Punta Water Refilling Station diha sa barangay hall niadtong tuig 2006 dihang si Navarro pa ang kapitan.

Gisaysay sa complaint ni Mar-Mier nga sa lease agreement, ang operator maoy mobayad sa telepono ug kuryente sa refilling station ug sa paghimo niining operational.

Apan human hatagi og pagtugot ang kapitan pagpirma sa kontrata, ang konseho sa barangay giingong nigahin dayon og P460 mil alang sa improvement sa refilling station.

Niadtong Hulyo sa nahisgutang tuig ang konseho sa barangay giingong nigahin na usab ug laing P7,700 aron igasto gihapon sa maong refilling station.

Dugang asoy sa reklamo ni Mar-Mier nga niadtong Abril 2007, ang konseho sa barangay nigahin na usab og P88 mil alang na usab sa pag-repair niini.

Kini gihulagway sa reklamante nga dakong kalapasan sa gipirmahang kontrata ni Navarro gawas nga giingong usa ra ang kwentador sa refilling station ug sa barangay hall.

Gusto ni Mar-Mier nga suspensuhon una sa Ombudsman si Navarro samtang imbestigahan pa ang iyang reklamo.

Buot usab sa reklamante nga tangtangon pagkakonsehal si Navarro kung kini mapamatud-ang sad-an sa iyang giduso nga complaint.

Labaw sa tanan, did-an na kining dili na makapapili sa bisan unsang posisyon kung matino sa anti-graft office nga nakahimo gyud og kalapasan.

Gipangayo usab ni Mar-Mier nga paatubangon sa anti-graft office si Ernesto Piodos nga maoy nagrepresentar sa refilling station nga giingong paryente ra usab ni Navarro.

Lakip sa gusto ni Mar-Mier nga ipatawag sa Ombudsman mao ang kanhi barangay Treasurer sa Punta Princesa nga si Mila Salarda.

Gisuwayan pagkuha sa Banat News ang habig ni Navarro aron kakuhaan og pamahayag kabahin sa pasangil apan pakyas ang maong tinguha. (Elly Bolonos)   (BANAT NEWS)