Riadag-7 gihangop ni Mike

CEBU, Philippines - Gihangop ni acting Mayor Michael Rama ang katukoran sa Regional Inter-Agency Anti-Illegal Drugs Action Group (Riadag-7).

Ang nahisgutang grupo gilangkuban og mga sakop nga gikan sa nagkadaiyang law enforcement agency diin ang nag-unang tumong mao ang pagsumpo sa ginadiling drugas.

Matud ni Rama nga mas daghang grupo nga makigbatok sa pagpayuhot sa ginadiling drugas mas labing maayo, aron daghan og bantayan ang mga drug trafficker.

Labing minos 12 ka drug trafficker ang gituohan sa Riadag-7 nga nag-operate sa Metro Cebu ug maoy gitutokan sa maong grupo.

Wala na hinuon mohagit ang acting mayor sa Riadag-7 sa angayan nga buhaton niini tungod sa iyang pagtuo nga kini nasayod nang daan.

“I don’t want to challenge them because I think they ought what to do, pero ang akong ipahinumdum nila nga trabahoon gyud,”sumala ni Rama.

Ang gustong masayran sa acting mayor nga mitrabaho ang bag-ong gimugna nga grupo og sikopon ang ilang mga gidudahan ug pamatud-an ngadto sa hukmanan.

“Kay lahi man gud ang pagsulti unya lahi pud ang pag-dokumento ug ang pag-entrap sa mga suspetsado,”dugang pamahayag ni Rama.

Gipasidan-an hinuon sa acting mayor ang Riadag-7 ug ang ubang tigpatuman sa balaud nga mosunod kanunay sa tukmang proseso.

Ang pasidaan ni Rama iyang giluwatan human usab pabuhii sa korte ang dinakpan sa kapolisan sa dakbayan nga si Pastor Leonardo Jastiva Sr.

Si Jastiva maoy gipasanginlan sa kapolisan nga utok sa pagdagit ug pagpatay sa iyang kaugalingong asawa nga si Judith.

Apan gipabuhian ni Judge Gabriel Ingles si Pastor Jastiva tungod kay kini gidakop sa kapulisan nga walay gipasikaran nga warrant of arrest.

Ang huwes wala makumbinser sa gihimong pagpasabot sa kapolisan ug mimando pagpabuhi kang Jastiva taliwala sa kasong parricide nga giatubang niini. (Elly Bolonos)   (BANAT NEWS)