Kanseron naghikog patay

CEBU, Philippines – Usa ka pintor kinsa wala na kaantos sa sakit nga kanser naghikog pinaagi sa pagpusil patay sa iyang kaugalingon didto sa sitio Bon Ami, Barangay Labangon, dakbayan sa Sugbu.

Ang biktima mao si Isidro Liloan Palad, 43, taga Bon Ami kinsa usa ka mamintorahay og balay ug nag-antos sa sakit nga lung cancer kon kanser sa baga.

Sumala ni Hazel nga anak sa biktima nga paingon na siyang matulog sa iyang lawak niadtong higayona dihang may nadungog siyang buto sa armas de fuego sa silong sa ilang balay.

Busa mikanaog siya ug maoy nakita niya nga gigakos na sa iyang inahan ang biktima nga nagkadugo na.

Dali nila kining gihatod ngadto sa Cebu City Medical Center apan gideklarar kini nga Dead On Arrival (DOA).

Segun sa kapolisan nga nabuslot ang tingkloy sa biktima agi sa bala nga maoy hinungdan sa hinanali niyang kamatayon.

Gidudahan sa pamilya sa biktima nga may dakong kalagmitan nga naguol lang sa iyang sakit ang biktima nga maoy hinungdan sa paghikog niini. (Lesley Caminade) (BANAT NEWS)