3 angol sa disgrasya sa motor

CEBU, Philippines – Tulo ang angol nga naglakip sa duha ka menor de edad dihang ang gisakyan nilang motorsiklo nawad-an og preno ug nakadasmag og tawo sa wala pa kini modasmag sa poste sa kuryente didto sa Sitio Kauswagan, barangay Bitoon lungsod sa Daanbantayan niadtong Domingo sa buntag.

Ang mga nalandig sa tambalanan mao ang drayber sa motorsiklo nga si Edu Ejara Conde, 15, ug ang angkas niini nga si Marlito Coyoca Conde, 13, ug si Charly Golpan, 38, nga maoy nadasmagan, nga pulos taga sitio Tagasa, barangay Bitoon.

Si PO2 Henry Compuesto sa Daanbantayan Police Station mibutyag nga ang duha ka menor de edad nagsakay sa motorsiklo paingon sa lungsod gikan sa Bitoon dihang sa pag-abot nila sa Kauswagan, nadasmagan sa ilang motorsiklo si Golpan nga naglakaw niadtong tungora kauban sa iyang maguwang nga si Ervin Golpan paingon unta sa ilang trabaho kay nawad-an og preno ang ilang motorsiklo.

Gumikan sa pagkawagtang sa preno, milahos kini pagdusmog ngadto sa haliging puthaw sa kuryente sa daplin sa karsada.

Ang mga menor de edad nga sakay sa maong motorsiklo pulos nanglupad ug pagtugpa niini sa karsada naserko balintong pa busa hapit mangabali-bali ang ilang kalawasan.

Ang mga standby na maoy naghatod sa tulo ka biktima ngadto sa tambalanan sa dakbayan sa Sugbo gumikan sa kagrabe sa ilang kahimtang. (Darrel A. Carumba) (BANAT NEWS)