Konduktor giluba sa kainom

CEBU, Philippines – Gumikan sa lighter, usa ka konduktor sa jeep pasaheroan, nadunggaban sa iyang kainom didto sitio Sta. Cruz, barangay Labogon, dakbayan sa Mandaue sa miaging kaadlawon.

Ang biktima mao si Junrey Guitget, 21, ulitawo, nga taga barangay Libo, lungsod sa Tuburan, samtang ang nakadunggab kaniya mao si Larry Telor Logon, 25, ulitawo, nga taga barangay Banban, lungsod sa Bogo.

Si PO2 Gil Tomada sa Presinto 3 sa Basak Police Station nga nahinabi sa Banat News miingon nga nag-inom ang duha sa usa ka tindahan sa maong dapit.

Dihang nangahubog na ang duha, kalit lang kining nagkalalis kay ang lighter nga gihulaman sa suspetsado gikan sa biktima wala na mahibalik ngadto sa naulahi.

Busa misangpot sa kainit ang maong lalis ug tungod kay puwerte nang lasbaga sa duha, naupsan ang suspetsado sa pailob, ug milipot kini makadiyot sa luyong bahin sa tindahan nga ilang giinoman ug sa pagbalik niini, gihansakan dayon og kalit sa kutsilyo niyang dala ang biktima.

Ang biktima nga walay hiantigohan sa self defense maayo kaayong pagkasabak sa dughan.

Dihang misirit na ang dugo sa samad sa biktima, misirit usab og dagan ang suspek apan nasugatan kini nila ni PO3 Rey Manatad nga maoy nakatubag sa maong alarma.

Ang biktima gihatod dayon ngadto sa Vicente Sotto Memorial Medical Center sa dakbayan sa Sugbu samtang ang suspetsado gibalhog dayon sa prisohan. (Romeo T. Limpangog) (BANAT NEWS)