Baker nanghinol napriso

CEBU, Philippines – Nagtingkagol sa prisohan ang usa ka baker human kini pasakai og kasong Acts of Lasciviousness ug Child Abuse gumikan sa iyang pagpanamastamas sa usa ka otso anyos nga bata didto sa Lawaan III syudad sa Talisay sa miaging gabii.

Ang suspek mao si Roger Gonzalez, 28, nga taga barangay Pardo ning dakbayan ug usa ka baker sa Adoptar Bakeshop nga nahimutang sa maong barangay.

Matud pa ni PO3 Edwin Albarado nga ang biktima mitan-aw og mga kalingawan sa peryahan dihang ang lasbag nga suspetsado kalit lang mitungha ug nagpakuyog sa biktima paingon sa mangitngit nga dapit.

Ug didto gihinol niya ang mga pribadong   parte sa kalawasan sa otso anyos nga bata.

Tungod sa kahadlok puwerting tiyabaw sa bata ug walay nahimo sa pagpakgang sa lihokang mga kamot sa suspek sa paghinol sa iyang kalawasan.

Apan nadunggan sa mga tanod ang hilak sa menor de edad busa dihang ilang gisubay ang maong hilak, nakita nila nga gipanamastamasan kini sa suspek.

Gipasakaan dayon sa kapolisan sa Talisay og kaso sa piskalya nga Acts of Lasciviousness ug Child Abuse ang maong suspetsado kagahapon. (Lesley Caminade) (BANAT NEWS)