Bukton gi-atsa

CEBU, Philippines – Hapit maputol ang bukton sa usa ka tawo dihang giatsa kini sa iyang silingan sa sitio Santo Niño, barangay Guizo, dakbayan sa Mandaue sa miaging hapon.

Si SPO1 Lino Baylosis sa Presinto 1 sa kapolisan sa maong dakbayan miila sa biktima nga mao si Luisito Sumalinog, 25, ulitawo ug ang miatsa kaniya mao si Julius Lima, 24, silingan sa biktima.

Matud pa ni SPO1 Baylosis nga nag-inom ang biktima ug ang suspetsado ug dihang nangalasbag, nagkalalis kini.

Dihang miinit na ang lalis, naupsan sa pailob ang suspek ug mikuha kini og atsa sa ilang balay unya giligid og tigbas ang biktima, ug usa sa gipuntariya sa iyang atsa mao ang bagolbagol ug liog sa naulahi.

Ang biktima nga anad kaayo sa lihay-lihay ug humok kaayo ang lawas sa pag-ikyas gikan sa makamatay nga atsa, wala gyud masabak sa ulo ug liog gawas sa iyang kamot ug bukton nga nahapitan sa nagpangidlap nga kahait nga atsa.

Ang biktima gihatod dayon ngadto sa Mandaue City District Hospital apan luwas na kini sa kuyaw nga kahimtang ug ang suspetsado nga nadakpan gibalhog dayon sa bilanggoan. -BANAT NEWS