CEBU, Philippines - Namatay ang usa ka tawong nadasmagan sa motorsiklo samtang ang drayber usab ug ang mga angkas sa motorsiklong midasmag kaniya, pulos usab nangaangol didto sa sitio Camansi, barangay Mojon, lungsod sa Sogod niadtong Biyernes sa gabii.
Ang namatay mao si Charlito Retisa Rivera, 38, minyo, samtang ang mga naangol mao ang drayber sa motorsiklo nga si Randy Bacayo Arangco, 38, minyo, ug ang duha ka mga angkas niini nga sila si Anthony Kent Canoy, 14 , ug Fritz Anthony Caayon, 13, ang tanan pulos taga Mojon.
Si PO3 Elymar Mendoza sa Sogod Police Station mibutyag sa Banat News nga ang motorsiklong gimaneho ni Arangco, nagdagan paingon sa Poblacion Sogod, gikan sa Mojon dihang pag-abot niini sa kurbadahon ug lugsungong bahin sa karsada, kalit lang milabang si Rivera.
Gumikan sa kakalit, wala gayud makabantay si Arangco, hinungdan nga wala na siya kakontrolar sa iyang sakyanan ug nadasmagan gyud si Rivera.
Dungan sa pagkadasmag, nalamba usab ang sakyanan ni Arangco nga maoy hinungdan sa pagtabuagsa ug pagkalagpot niya ug sa iyang duha ka angkas nga sila si Canoy ug Caayon.
Apan si Rivera kinsa maayong pagkabunal sa ulo sa sementadong karsada gideklarar nga patay na sa paghiabot niini sa Vicente Sotto Memorial Medical Center. – BANAT NEWS