Bihonan gipamulta'g P70 mil

CEBU, Philippines - Pabrika sa bihonan gipamulta sa Environmental Management Bureau sa Department of Environment and Natural Resources (DENR) tungod kay nag-operate kini nga walay Environmental Compliance Certificate (ECC).

Ang Citifoods Industries nga nahimutang diha sa barangay Cansojong   gipamulta og P70 mil sa nahisgutang ahensiya human masuta nga nag-operate kini sukad pa niadtong tuig 1993 nga walay ECC.

Ang maong kamanduan   giluwatan sa EMB niadtong Pebrero 17, 2009 kinsa ang maong pabrika   gihatagan og 60 ka adlaw sa ilang pagbayad sa multa.

Kahinumduman nga niining bag-o lang ang bihonan gireklamo nga hugaw ang pagpamuhat og bihon ug usa ka concerned citizen mipadangat sa maong reklamo ngadto sa buhatan ni Konsehal Bernard Odilao kinsa tsirman sa komitiba sa kalikupan. Apan ang assistant plant manager nga si Kennard Ngosiok ang mihagit sa pagtandi sa ilang pabrika ngadto sa ubang pabrika sa kalimpyo sa proseso.

Si Odilao uban sa mga sakop sa City Health, City Planning Development Coordinator, Engineering Office ug opisyal sa barangay mipahigayon og inspeksiyon sa maong pabrika diin negatibo ang resulta.

Matud ni Odilao nga ilang nasuta ang ka-istrikto sa maong pabrika sa pagproseso sa ilang bihon apan aron sa katagbawan sa mga Talisaynon gibuhatan nila og aksiyon ang nahisgutang reklamo nga nadangat diha sa iyang buhatan. – BANAT NEWS