Kandidata sa Bikini Open nakaligo og gas naospital

CEBU, Philippines - Nalandig sa tambalanan ang usa sa mga kandidata sa gihimong bikini open sa usa ka beach resort sa dakbayan sa Lapulapu human imbes tubig ang ibubo sa iyang lawas samtang nagpahigayon sa talent show gas ang iyang nabubo.

Ang maong kandidata giilang si Sandra Repi, 18, usa ka Fil-Norwegian ug kasamtangang nagpuyo sa dakbayan sa Talisay ug usa sa Ultimate Body of Desire Bikini Open nga gihimo diha sa Karancho Beach Resort sa barangay Maribago dakbayan sa Lapulapu.

Si Repi bisan pa man sa nahitabong aksidente maoy nakoronahang New Placenta Face award ug gilupig ang onse pa ka mga kandidata alang sa maong award.

Ang maong bikini open gisaksihan sa mga mahiligon sa susamang mga palabas ilabi na mga kalalakin-an ug pipila ka mga sakop sa media.

Ang dalaga human sa iyang show gikatahong daling mihumol sa dagat, apan dangtan og pila ka gutlo nabantayan kini sa mga sakop sa media nga nagmulo sa iyang lawas ug gidala sa usa ka tambalanan.

Matud pa sa iyang manager nga si Danny Buoc wala makaangkon og grabeng kadaot sa lawas ang iyang talent ug luwas na ang kahimtang niini.

Wala pa maklaro kung kinsay sad-an sa aksidente apan sagad sa mga kandidata mipakita'g katakos sa ilang talent pinaagi sa nagkadaiyang paagi lakip na ang pagbubo og likido sa ilang lawas.

Apan una pa ang talent show, dunay mga nag-entertain nga nanayaw og ‘fire dance’ ug nagbugwak og kalayo ug gidudahang posibleng nasaypan ang usa sa mga botelya sa gas nga mao hinuoy nabubo sa dalaga diha sa iyang lawas.

Ang migawas nga mananaog sa maong bikini open mao si Eunice Lastimosa. – BANAT NEWS