Ama-ama gipusil patay

CEBU, Philippines - Namatay ang usa ka mag-uuma kinsa gi-unay og pusil sa iyang humabdos didto sa bukirang bahin sa barangay Magcagong lungsod sa Sibonga, Cebu niadtong Huwebes sa hapon.

Ang biktima kinsa nakaangkon og duha ka samad pinusilan sa sentro sa iyang dughan mao si Antolin Caraca, 47 , minyo, usa ka mag-uuma ug nagpuyo sa nahisgutang lugar.

Samtang ang suspek mao si Renante Dela Rosa, 22 , minyo, nga anak ra usab sa gikatipong babaye sa biktima.

Si SPO3 Ramon Padilla sa Sibonga Police Station mibutyag sa Banat News nga samtang nagdaob og kahoy nga ulingon ang biktima, kalit lang kining giduol sa suspek ug gitirohan sa iyang armas de fuego nga wala hisayring kalibre.

Ang biktima kinsa nasabak sa sentro sa iyang dughan sa makaduha ka higayon nahagba sa yuta ug ang suspek mibiya usab dayon niini.

Patay nang nahiabot sa tambalanan ang biktima samtang ang suspek mitahan dayon sa kapolisan ug nagtingkagol na karon sa prisohan aron atubangon ang kasong isang-at batok kaniya.  - Darrel A. Carumba (BANAT NEWS)