CEBU, Philippines - Ang hepe sa kapolisan sa dakbayan sa Talisay, Supt. Henry Binas , giawhag sa Mines and Geosciences Bureau sa Department of Environment and Natural Resources (MGB-DENR) nga mogama og aksiyon kabahin sa ilegal nga pagpangubkob og mga bas ug graba diha sa sapa sa Mananga sa habig sa barangay Jaclupan ug Camp 4.
Ang nahisgutang ahensiya mipadangat og suwat ngadto sa siyudad sa Talisay kabahin sa maong problema niadtong Pebrero 9, 2009 ug nadawat kini sa City Administrator Office niadtong Huwebes.
Ang DENR nagkanayon nga nabantayan sa ilang technical personnel ang pagkuyanap sa ilegal nga pagpangubkob og mga bas ug graba sa maong sapa.
Matud sa DENR nga ang pagpangubkob og bas ug graba diha sa maong mga lugar higpit nga gidili tungod kay nahisakop kini sa Mananga Watershed Forest Reserve nga usa ka Protected Area.
Ang DENR miawhag kang Binas nga mohatag og suporta ug motabang sa pag-implementar sa ilang kampanya batok sa pagpanghilabot sa maong mga butang diha sa sapa.
Si Binas mibutyag sa Banat News nga nagpadayon ang ilang operasyon batok sa mga ilegal nga mangubkubay og bas ug graba ug gani ubay-ubay na ang ilang napasakaan og kaso ngadto sa piskaliya.
Apan dili nila mabantayan sulod sa 24 oras ang maong mga lugar nga hingtungdan tungod kay usa sa ilang mga gitutokan mao ang mga barangay diin kasagaran mahitabo ang mga krimen sama sa tulis ug patay.
Matud ni Binas nga mogama sila og team nga langkuban sa mga kawani sa city hall, kapolisan, mga opisyal ug tanod sa barangay nga hingtungdan ug representante sa DENR aron matutokan usab ang nahisgutang problema. - Brenda D. Batuto (BANAT NEWS)