CEBU, Philippines - Gitug-an ni Cebu City South District Rep. Antonio Cuenco nga nahuman na ang iyang tahas sa pagbuak sa barangay Guadalupe.
Matud pa ni Cuenco sa press conference kagahapon nga napasar na sa 3rd and final reading house on plenary session ang iyang gipanday nga balaudnon sa paghimo sa Banawa-Englis nga usa ka barangay ug buwag na sa barangay Guadalupe.
Ang maong balaudnon napasa na ngadto sa Senado ug pagasaw-on usab kini ni Senate Minority leader Aquilino “Nene” Pemintel.
Nagtuo si Cuenco nga dili ra usab kini magdugay sa Senado tungod kay usa ra man kini ka local bill.
Gipaabot ni Cuenco nga sa sunod nga bulan mapirmahan na ni Presidente Gloria Macapagal Arroyo ang maong balaudnon aron mahingpit nang balaud.
Si Cuenco nagkanayon nga posibleng plebisito pagahimuon sa bulan sa Mayo samtang ang election sa mga opisyales unya sa bag-ong barangay nga Banawa-Englis ipahigayon usab sa bulan sa Nobiyembre ning kasamtangang tuig.
Gipahibawo usab ni Cuenco nga aprubado na usab sa House Committee on Local Government iyang balaudnon nga nahimo og laing distrito sa South district ning siyudad.
Apan sa sunod semana pa kini maaprobahan sa House on Plenary Session una pa iduso ngadto sa senado.
Iyang gitataw nga sulod niining tuig makahimo na siya’g laing distrito aron ang pagpili sa bag-ong kongresista maapil na sa presidential election karong tuig 2010. - Chester Abadilla (BANAT NEWS)