Pagpasar sa daghang nurses nakapabalaka
CEBU, Philippines - Gibati og kabalaka ang presidente sa Philippine Nurses Association (PNA) Cebu Chapter nga si Dr. Parolita Mission nga madugangan ang mga nurses sa nasud nga walay trabaho.
Kini taliwa sa kalipay ni Mission nga mas taas karon ang percentage sa mga nursing graduates nga nakapasar sa gihimong pasulit niadtong bulan sa Nobiyembre nga Nursing Licensure Examination (NLE).
Moabot sa 39, 455 gikan sa 88, 649 ka nursing graduates ang mipasar sa NLE nga 44.51 porsiyento ug mas taas itandi sa 43.1 porsiyento nga nakapasar sa NLE nga gipahigayon sa buwan sa Hunyo sa susamang tuig.
Gani lakip sa mga topnotchers mao sila si Miguela Macuto Gabisan sa Cebu Normal University (No. 5) ug Ryan Daniel Rivera Dablo sa University of San Carlos (No. 9).
Apan nabalaka si Mission nga ang kadaghanan sa mga nakapasar sa NLE sa miaging tuig madugang lang sa mga unemployed sa nasud nga karon nagkaanam og kadaghan tungod sa nasinating financial crisis dili lang dinhi sa Pilipinas kun dili sa tibuok kalibutan.
“Actually nalipay ta sa taas nga passing percentage but to some extent naguol sab ta kay duna bayay pagminos sa employment tungod sa global recession,” sumala ni Mission.
Nagkanayon si Mission nga bugtong konswelo lang sa mga Filipino nurses tungod kay kini giingong nakabentaha itandi sa mga nurses sa ubang kanasuran.
Kini tungod kay ang mga Filipino nurses giingong gitudloan sa mga values sa ila pa lang pagtungha, nga muresulta sa maayo niining panerbisyo. - Elly Bolonos (BANAT NEWS)
- Latest
- Trending
