Pastor Jastiva Gipabuhian

CEBU, Philippines - Gimanduan sa korte ang kapolisan sa siyudad sa Sugbu nga pabuhian ang pastor sa International Missionary Society of Seventh Day Adventist Reform Movement nga giakusahang may kalambigitan sa pagpatay sa iyang kaugalingong asawa human aprobahe   ang iyang gisang-at nga petition for habeas corpus.

Sumala pa ni RTC-7 Judge Gabriel Englis nga iyang gipaboran ang petition for habeas corpus nga gisang-at sa anak ni Leonardo Jastiva Sr. nga nag-ingong illegal ang pamaagi sa pagdakop sa iyang amahan.

Ang Homicide Section sa Cebu City Police Office misang-at og kasong parricide batok ni Jastiva tungod sa pagpatay sa asawa niining si Judith Jastiva kinsa na-missing sukad pa niadtong Pebrero 9 ug napalgang patay na ug nadugta na sa sitio Cantipla Uno sa barangay Tabunan niadtong adlaw’ng Miyerkules.

Si Judge Inglis nagkanayon diha sa iyang upat ka pahinang desisyon nga dili mosaler ang warrantless arrest pagsikop sa pastor kay napakyas kini sa pag-comply sa tulo ka mga rekisitos aron matawag nga legal ang pag-aresto nga walay warrant of arrest.

 Ang warrantless arrest mahimo lang legal kung dunay ‘full-knowledge’ ang kapolisan sa krimen, ang krimen mao pay paghimo o padulong pa himuon ug ang ikatulo mao nga naaktuhan gyud nga gihimo ang krimen.

Gipasabot ni Judge Englis nga sa kaso ni Jastiva, dugay nang nahitabo ang pagpatay sa biktima nga si Judith ug nilanat na og kapin sa usa ka semana una pa kini mahibaw-ing maoy suspek ug una pa kini gidakop.

Gitataw usab sa huwes nga wala usab igong rason ang kapolisan sa pagpadayon og kustodiya sa pastor tungod kay wala pa miabot sa korte ang kasong parricide batok kang Jastiva.

Apan giklaro ni Englis nga ang pagtugot niya sa petition for habeas corpus wala magpasabot nga wala nay sala si Jastiva sa kamatayon sa iyang asawa, buot lang sa huwes nga pinasubay sa proseso ang pagdakop ug pagpasaka sa kaso.

Giaghat hinuon ni Judge Englis ang polis nga subayon ang regular nga proseso sa pagsang-at sa kaso pinaagi sa preliminary investigation sa piskaliya dayon ipasaka sa korte una pa kini palutsan og warrant of arrest.

Ang maong desisyon gikalipay ni Leonardo Jastiva ug mga anak niini nga diha palang sa paghusay sa petisyon kanunay’ng naggakus inubanan lakip na sa iyang tulo ka mga abogado.

Si Sr. Supt. Patrocinio Comendador, director sa CCPO sa pakighinabi sa Banat News nagkanayon nga wala lang ma-appreciate sa huwes ang merito sa kaso apan misabot sa nahimong desisyon niini sa petisyon.

Sumala pa niini nga ang parricide case nga ilang nasang-at igo rang na-docket apan wala mapailawom sa inquest proceeding tungod kay gihatagan og higayon sa korte ang petisyon.

Matud pa ni Comendador usa sa ilang posibleng dangpang opsyon mao ang pagsang-at og petition for certiorari batok sa huwes o ba kaha sa pagsunod sa regular filing sa kaso diin human nila buhii si Jastiva patubagon kini sa piskaliya sa kaso sulod sa napulo ka adlaw.

Kun lig-on ang kaso batok kaniya hayan mapasaka na ngadto sa korte ang kaso ug paabuton nalang nga mopagawas og warrant of arrest ang korte batok kang Jastiva.

Giangkon ni Comendador nga sa kadugay na nilang pagpasaka og mga kasong may pagkasusama niini og pamaagi sa pagdakop karon pa sila makasuway nga gisupo sa korte.

 Si Jastiva gibuhian sa CCPO ngadto sa iyang mga kabanay ug sumusunod inubanan sa ilang mga abogado alas 3:15 kagahapon sa hapon. - Uban sa report ni Edwin Ian Melecio (BANAT NEWS)