Tindahang di mobuhis sirhan

CEBU, Philippines - Inihap na lang karon ang mga adlaw sa mga magpapatigayon sa dakbayan sa Sugbu nga napakyas pagbayad og buhis ug niadtong wala usab maka-renew sa ilang business permit.

Matud ni City Assistant Treasurer for Operations Tessie Camarillo nga ila nang gisugdan pagpadala og demand letter ang maong mga magpapatigayon ug kadtong magdumili gyud sa pagbayad sa buhis, pasirahan na.

Partikular na niini kadtong mga business establishment sa siyudad nga hangtud karon wala gihapon maka-renew sa ilang business permit.

Miingon hinoon si Camarillo nga ilang hatagan sa tanang kahigayonan ang mga magpapatigayon nga makabayad sa ilang buhis.

Sa nasayran, kadtong mga magbubuhis nga karon lang mobayad sa ilang obligasyon pahamtangan na og multa sa kagamhanan sa dakbayan.

Kini tungod kay niadto rang miaging buwan ang gihatag nga deadline sa City government sa mga magbubuhis pagbayad sa ilang obligasyon nga walay multa.

Ang kagamhanan sa dakbayan mopahamtang na og 25 porsyento nga surcharge sa bayranan sa mga magbubuhis ug dugang 2 porsyento nga interest matag bulan.

Apan midugang si Camarillo nga kadtong mga negosyante nga magdumili gyud pagbayad og buhis, kini ilang irikomendar nga pasirad-an.

Lakip sa gipasidan-an sa City assistant treasurer mao kadtong mga negosyante nga wala gyud magparehistro sa ilang mga patigayon.

Ang pagsuroy ug pagpangita niini gitugyan na hinoon ngadto sa Tax Mapping Division sa City Treasurer’s Office.

Apan karon pa lang giawhag nang daan ni Camarillo ang hingtungdang mga magpapatigayon nga magparehistro na sa ilang mga negosyo. - Elly Bolonos (BANAT NEWS)