City Hall mibayad P357 milyones sa JICA para sa SRP

CEBU, Philippines - Mibayad na usab ang kagamhanan sa dakbayan sa Sugbu kagahapong adlawa sa utang niini pag-ugmad sa South Road Properties (SRP).

Moabot sa P357 milyones ang gibayad sa city government ngadto sa Japan International Cooperation Agency (JICA) pinaagi sa Land Bank of the Philippines (LBP).

Kini na maoy ikapito ka higayon nga mibayad ang kagamhanan sa dakbayan ngadto sa JICA sa loan niini nga muabot sa 12.315 million yen.

Sa kinatibuk-an, mukapin na sa P1.8 bilyones ang nabayad sa siyudad sa utang niini nga naglakip sa interest sulod sa kapin sa tulo ka tuig.

Ang sunod nga pagbayad sa dakbayan sa dakong utang niini pag-ugmad sa SRP gitakda na usab unya sa buwan sa Agosto.

Matud ni City Administrator Francisco “Bimbo” Fernandez nga sukwahi sa nangaging katuigan, dili na karon lisod ang pagbayad sa siyudad sa utang niini.

Kini tungod kay dunay gipaabot nga kuwarta ang city government gikan sa Filinvest Land Incorporated agig pasiunang bayad sa pagpalit niini og napulo ka ektarya sa SRP.

“Ang panudlanan sa siyudad ma-replenish ra kay makuhaan tuod pero duna man poy muabot, so, dili na ta maglisod,” sumala ni Fernandez.

Ang Filinvest gipaabot nga mutunol og P348 milyones ngadto sa kagamhanan sa dakbayan karong Marso 3 isip unang bayad niini sa gipalit nga luna sa SRP.

Sayon na lang unya sa city government ang pagkuha sa titulo sa SRP gikan sa LBP nga ihatag sa Filinvest human ang maong bangko miisyu og certification sa siyudad.

Ang LBP maoy naggunit sa mga titulo sa 240 ka ektaryang luna sa SRP isip maoy bangko nga nakiglambigit sa pagpangutang sa kagamhanan sa dakbayan sa JICA.

Gawas sa pagpalit og luna sa SRP, ang Filinvest mupalambo usab sa laing 40 ka ektarya sa nahisgutang propiedad pinaagi sa pagpakig-joint venture sa siyudad. - Elly Bolonos (BANAT NEWS)