Shabu gisulod sa kinatawo sakpan sa jailguard

CEBU, Philippines - Arestado ang usa ka 33-anyos nga babayeng taga barangay Calamba human kini giingong misuway og palusot og shabu sulod sa Cebu City Jail niadtong miaging adlaw.

Si Carmela Menchavez, nakuhaan og duha ka medium pack sa shabu sumala pa ni Cebu City Jail Warden, Supt. Efren Nemenio atol sa pagduaw unta niini sa iyang kapuyong piniriso.

Matud pang Nemenio ang mga babayeng jailguards diha sa ganghaan nga maoy mirekisa kaniya sa usa ka pribadong lawak alang sa susama niining matang nga inspeksyon nakasigpat sa misiwil nga plastic sa kinatawo niini.

Gikatahong diha gipasok sa kinatawo ni Menchavez ang maong pinaketeng shabu aron di basta makapkapan sa mga gwardiya.

Dihang giimbestigar ni Nemenio ang suspek kini gikatahong mitug-an nga ang maong shabu iya untang ihatod ngadto sa usa ka binilanggo nga ginganlan og Kerwin Espinosa.

Apan nagkanayon si Nemenio nga dihang ilang giimbestigar si Espinosa kusganon kining mihimakak. Si Espinosa gikatahong nabilanggo tungod usab sa mga kasong may kalambigitan sa ginadiling drugas.

Niadtong miaging Pebrero 10, usa usab ka Archie Quijano ang nadakpan sa jailguard sa CCJ human makuhai og usa ka paketeng shabu.

Samtang niadtong miaging buwan, pito ka mga lalaki nga mga crew sa Nico Lights Sound System ang gidakop sa mga gwardiya tungod sa pagdala og shabu sulod sa maong bilanggoan.

Nadiskubrehan ang 22 ka paketeng shabu diha sulod sa duha ka soundbox kun baffles sa maong sound system, ang wala na makagawas sa Cebu City Jail mao sila si Gerald Villeno, Steve Villeno, Juan Villeno Jr., Gerome Villeno, Edwin Geson, Christopher Sacristan, ug Joven Baydal.

Kalapasan sa Section 11 sa Akta Republika 9165 ang gipasaka batok sa pito, wala pa hinuon maestablisar kung kinsa sa pito ka mga crew ang responsable sa pagsuksok sa maong illegal nga drugas diha sa baffles. - Elly Bolonos (BANAT NEWS)