Feb. 23 ug Feb. 24 special holidays

CEBU, Philippines - Gideklarar nga holiday ang Pebrero 23, adlaw’ng Lunes ug Pebrero 24, adlwa’ng Martes tungod sa selebrasyon sa Edsa revolution ug sa Charter sa dakbayan sa Sugbu.

Ang Pebrero 23, gideklarar ni Presidente Gloria Arroyo nga Special Holiday sa pribado ug publikong tunghaan tungod sa paghinumdom sa ika-23 anibersaryo sa EDSA People Power Revolution.

Si Press Secretary Cerge Remonde miingon nga ang Proclamation No. 1728 para lamang sa mga estudyante ug walay labot ang mga trabahante sa nahisgutang holiday.

Si Remonde nagkanayon nga nagkasabot ang presidente ug ang Department of Labor and Employment nga dili apilon ang mga trabahante sa nahisgutang holiday tungod sa nasinating krisis karon.

Samtang dinhi sa dakbayan, ang Pebrero 24 gideklarar sa City Hall nga special non-working holiday sa tanang Sugboanon estudyante man o trabahante tungod sa kasaulugan sa Charter Day.

Giklaro hinuon ni Cebu City Public Information Officer Najiel Bañacia nga nahinabi sa Banat News nga Cebu City ra ang moselebrar sa katukuran sa dakbayan.

 Samtang si DOLE-7 director Elias Cayanong nagkanayon nga tungod kay special holidays busa walay double-pay ang mga trabahante nga motrabaho sa adlawng Pebrero 24 samtang ang mabulahan lang sa Pebrero 23 mao ra ang mga estudyante tungod kay walay klase. - Lesley Caminade (BANAT NEWS)