CEBU, Philippines - Saksi sa nahitabong pagsignit sa kapikas sa pastor nabalakang silay balikan sa mga suspek nga mipatay sa kapikas sa maong pastor.
Ang maong saksi nga gikuha sa kapolisan sa Cebu City Police Office inubanan sa mga sakop sa media kagahapon diha sa iyang panimalay sa dakbayan sa Talisay mibutyag nga diha gyud siya nianang gabii sa pagsignit kang Judith Jastiva Pebrero 9 duol sa iyang trabahoan.
Si Donato, (tinuod pangalan gitago sa Banat News) trabahante sa usa ka buhatan diha sa may Happy Valley sa dakbayan sa Sugbu diin mahitabo ang pagsignit personal nga midangop sa DYHP-RMN ug nagpatabang.
Dugang pa niini gi-turnover usab niya sa kapolisan ang usa ka simpack sa cellphone nga dunay mga text messages nga may koneksyon sa krimen.
Si Donato, dunay duha ka sakyanan nga iyang nakitang nagparking sa maong dapit nianang gabhiunang gisignit si Judith, ang awto nagbabag sa usa ka motorsiklo nga giluwanan sa magtiayong Jastiva.
Matud pa niya nga wala siya’y nakitang komosyon o bisan unsang kasikas diha sa dapit diin magbabag ang sakyanan tungod kay gibana-bana niyang 50 ngadto sa 70 metros lang ang gilay-on niya sa lugar.
Diha nalang siya masayod nga dunay “kidnapping” nga nahitabo dihang nangabot na ang mga polis. Nianang pagka-petsa 10, gikatahong giduol siya ni Pastor Jastiva ug nagpakisayod bahin sa iyang nasaksihan sa milabayng gabii.
Tungod kay wala siya makaklaro sa mga dagway sa mga tawo mihimakak siya niini. Giingong nangayo dayon sa iyang cellphone number ug address si Pastor Jastiva.
Apan nianang pagkapetsa 15, gitug-anan siya sa iyang asawa nga mianha sa ilang balay si Pastor Jastiva ug giingong nagpakisusi kung diha ba gyud magpuyo si Donato, gihulagway niadtong tungura sa iyang inahan nga masuk-anon ang dagway sa maong pastor.
Nianang petsa 17, subling nagkita si Donato ug Pastor Jastiva sa iyang trabahoan ug giingong gingutana kung unsay iyang nakita nianang Pebrero 9 sa gabii, diha na nakamatikod si Donato nga daw ‘gipanagatan’ siya niini kay magpunay ra og tando hinungdan nga iyahang gibarugan ang una na niyang gipamahayag.
Petsa 19, si Donato nagkanayon nga may nakit-ang usa ka Touch Mobile simpack ang anak sa iyang agalon gawas sa balay ug kini gihatag ngadto kaniya, apan tungod kay di open line iyang cellphone iyaha kining gihatag ngadto sa laing kauban.
Diha na gibati og tumang kabalaka si Donato dihang ang kaubang gihatagan niya sa simpack nga mihiling sa message inbox nakadiskubre og mga mensaheng may kalambigitan sa pagpatay kang Judith Jastiva.
Si Pastor Jastiva gipasakaan og kasong parricide kagahapon sa Homicide Section tungod sa mga kadudahang pamahayag niini kabahin sa kamatayon sa iyang asawa ingon man mga ebidensya, misang-at usab siya og petition for habeas corpus sa korte.
Ang patayng lawas ni Judith napalgang nadugta na ug gituuhang gilugos una pa gidakdakan og dakong bato diha sa sitio Cantipla Uno sa barangay Tabunan niadtong adlawng Miyerkules.
Gawas kang Pastor Jastiva, gipasakaan usab ang laing tulo pa ka wala mailhing mga lalaki nga giingong maoy kakunsabo niini sa pagpatay sa iyang asawa.
Si Jastiva dihang gihinabi sa mga sakop sa media kusganong mihimakak nga siya maoy mipapatay sa iyang asawa ug miangkong posibleng naglibog lang siya sa pagbalhin-balhin sa nadawat nga text message gikan sa mga misignit sa iyang kapikas.
Usa sa mga mensahe sa TM simpack nga gi-turnover nadawat petsa 16 alas 11:56 sa gabii nagkanayon “Tor, among gipatay ang imong maluibong asawa, dili lamang ikaw ang giluiban kundi lakip ako, ang patayng lawas sa imong asawa atua sa TransCentral Highway 10 ka dupa daplin sa dalan. Ayaw na kini ipaimbestigar sa kapolisan kay kung among madungog hutdon namo og patay ang imong pamilya lakip ang imong ginikanan.”
Matud pa ni Monilar nga ila pang susihon ang sulod sa maong simpack nga gituuhan nilang makatabang gyud og dako sa imbestigasyon lakip na ang pagtumaw sa saksi.
Samtang si Cebu City acting mayor Michael Rama buot makisayod kun tinuoray bang nangita ang kapolisan sa asawa sa pastor dihang nagpatabang kini bisan na may pagdudang mitumaw sa pamahayag niini.“Kung na-impress sila atong kidnap me, that something should be look into and the only way that probably can resolve my mind of how effective and efficient sila in handling that particular case is a report,” sumala ni Rama.
Sa pikas bahin, gipadayag ni Rama ang kaandam sa kagamhanan sa dakbayan pagtabang sa pamilya pagpahiluna sa biktima ug mimando nasa labaw sa Department of Social Welfare and Services nga si Cathy Yso pagsusi sa nag-unang gikinahanglan sa pamilya sa biktima. - Uban sa mga report nila ni Elly Bolonos ug Chester Abadilla (BANAT NEWS)