3 gobernador supak sa MOEP

CEBU, Philippines - Tulo ka gobernador dinhi sa Central Visayas mihangyo kang Presidente Gloria Macapagal Arroyo nga manduan si Environment Secretary Jose Atienza nga i-recall ang order niini kabahin sa pagpangisyu sa Mineral Ore Export Permit (MOEP) sa dili pa ang shipment sa mineral ores gawas sa nasud.

Mikabat sa 42 sa 72 ka miyembro sa League of Governors of the Philippines (LGP) apil na niini si Gobernador Gwendolyn Garcia, Gobernador Erico Aumentado sa Bohol, ug Gobernador Emilio Macias II sa Negros Oriental mipirma aron mo-apelar kang Arroyo kabahin sa Department Administrative Order (DAO) 20-2008 nga sa sayo pa giisyu ni Atienza nga gihulagway nilang “counter-productive and illegal.”

Sa press conference kagahapon si Garcia mibutyag nga apil siya sa nipirma sa maong apelasyon. “I support the stand because that’s the stand of league of the provinces,” matud pang Garcia.

Ang liga gipangulohan sa national president Misamis Oriental ug Gobernador Loreto Leo Ocampos ug laing 12 pa ka miyembro nakigtagbo kang Atienza niadtong Septembre sa miaging tuig ug gihisgutan ang maong isyu.

Sumala pa sa mga gobernador nga supak niini daw nanghilabot na sa ilang hurisdiksyon ang maong kamandoan.

“An MOEP interferes with the power of the local governments specifically the provincial Mining and Regulatory Boards (PMRB’s on the issuance of Ore Transport Permits (OTPs).We just believe that the administrative order needs to be further studied in the light of our respective steers of responsibility in governance,” nagkanayon ang gobernadora. – BANAT NEWS