Moratorium sa tuition fee gimando sa CHED
CEBU, Philippines - Masaligon ang kadagkuan sa Commission on Higher Education CHED-7 nga maminaw ang tagdumala sa mga unibersidad ug mga colleges dinhi sa Central Visayas nga mosanong sa awhag nga dili lang una mopatuman og dugang usbaw sa matrikula sa subling pagbukas sa klase karung tuiga.
Gibutyag ni CHED-7 director Candilario Aytona nga ilaha nang napadad-an sa kopya sa memorandom gikan sa ulohang buhatan ang tanang mga unibersidad ug kolehiyo dinhi sa Central Visayas may labot sa pagpatuman og moratorium sa tuition fees.
Gipasabot ni Aytona nga gituyo kini aron matabangan ang mga ginikanan nga makapadayun sa pagpatungha sa ilang mga anak ilabina kadtong pamilya sa mga kawani nga nataktak sa ilang trabaho epekto sa nasinati nga kalibutanong krisis sa ekonomiya karun.
Pagkakarun masaligon si Aytona nga makadawat og positibong tubag gikan sa mga tagdumala sa mga tunghaan dinhi sa Central Visayas lakip na dinhi sa Sugbo.
Dunay sobra 20 ka mga unibersidad ug colleges ang naa dinhi sa rehiyon nga miduso na og application alang sa tuition fee increase karung tuiga.
Hinuon dunay pipila ka mga unibersidad ang nipadayag na nga dili mopatuman og usbaw sa tuition fees, gani ang University of the Visayas mipatuman og 10 percent tuition fee decrease sugod karong summer 2009.
Ang University of Cebu mipakunhod usab sa ilang tuition fee lakip na ang Cebu Institute of Technology (CIT) agi’g pagtabang sa mga ginikanan. – BANAT NEWS
- Latest
- Trending
