CEBU, Philippines - Mahatagan na sa ilang tag-P10 mil nga extra cash gifts ang tulo ka kagawad sa barangay Labangon sa siyudad sa Sugbu ingon man ang ilang SK chairman.
Kini human sa husay nga gipahigayon kagahapon ni Cebu City DILG Director Patricio Gabuya tali nilang kapitan Felix Abella ug sa mga reklamante nga sila si kagawad Victor Buendia, Jojo Lozano ug Rudy Tabasa ingon man sa SK chairman nga si Gabriel Ledesma.
“Nag-uli na man sila, naglamanuhay pa, unya na-explain man to sa kapitan ug sa ilang treasurer nga mag-supplemental budget lang sila para sa cash gift,” sumala pa ni Gabuya.
Apan si Buendia miingon nga ilang ipadayon ang pagsang-at og reklamo ngadto sa Ombudsman Visayas batok kang Abella tungod kay usa ka kalapasan sa section 512 sa Local Government Code gihimo ni Abella.
Ang nahisgutang lakang sa mga reklamante gikasurpresa ni Abella apan mipadayag sa iyang kaandam pag-atubang kanila. – BANAT NEWS