Misis sa Pastor napalgang dugta na

CEBU, Philippines - Usa ka babayeng wala nay sapot sa ubos ug nagsugod na og kadugta napalgan kagahapon sa buntag diha sa sitio Cantipla, barangay Tabunan ning dakbayan ug positibong giila nga iya sa giingong gidagit nga asawa sa Pastor walo na ka adlaw ang nakalabay.

Dako ang pagdudang posibleng gipanamastamasan pa ang biktima sa mga wala mailhing mamumuno una pa kini patya tungod kay wala nay sapot si Judith Jastiva, kansang patay'ng lawas positibong giila sa iyang 18-anyos nga anak nga babaye.

Mismong ang bana sa biktima nga si Pastor Leonardo Jastiva ug mga anak didto sa Rolling Hills Funeral Homes dakbayan sa Mandaue maoy personal nga misusi sa maong patay’ng lawas ug positibong miila kaniya tungod sa mga uwat sa bitiis.

Si Sr. Insp. George Ylanan, hepe sa Investigation and Detective Management Branch sa Cebu City Police Office mibutyag sa mga tigbalita nga mismong si Pastor Jastiva maoy mi-text kanila nga nagpahibalong may tawong mi-text kaniya nga makit-an ang patay’ng lawas sa iyang asawa diha sa Cantipla Uno.

Ang kapolisan nga miimbestigar sa kadudahang pagkasignit sa tulo ka mga lalaki kang Judith sukad pa nga kini nahitabo diha sa dalan P. Abella, Happy Valley Subdivision, barangay Labangon niadtong Pebrero 9 sa gabii.

Si Pastor Leonardo Jastiva, presidente sa International Missionary Society of Seventh-Day Adventist Church Reform Movement unang mipasangil nga binuhatan sa kaatbang nga simbahan ang mihimo niini sa iyang asawa, apan iya kining gibakwi nianang pagkasunod adlaw.

Sumala pa ni Sr. Supt. Patrocinio Comendador base sa text ni Pastor Jastiva, ‘specific’ kaayong gibutang kun asa makita ang patay’ng lawas , ug mismong si Jastiva gikatahong nakakita sa jacket sa iyang asawa diha sa Transcentral Highway sa dihang mihimo siya og kaugalingong pagpangita.

Tungod sa maong balita sa Pastor daling gisubay sa mga tinugyanan sa IDMB ang nahisgutang lugar apan gumikan sa kangitngit negatibo ang maong lakaw.

Apan giingong miinsister si Jastiva pinaagi sa text nga dako ang iyang pagtuong naa ra gyud diha ang iyang asawa.

 “Ang text messages ni Pastor Jastiva specific kaayo sa lugar nga gipang-mention niini nga ini’g abot sa usa ka billboard sa lugar moliko lang sa tuong bahin ug naa na didto ang patay’ng lawas,” sumala pa ni Comendador.

Sa pakighinabi sa ABS-CBN TV Patrol Central Visayas kagahapon wala pa sila mokonsiderar kang Jastiva nga suspek sa maong krimen.

Matud pang Comendador sa miaging gabii pa sila gustong makigkita kang Pastor Jastiva tungod sa mga text niini kun asa dapita makit-an ang lawas sa iyang kapikas, apan wala gyud kini magpakita ug kagahapon lang mipatim-aw sa punerarya.

Nahibulong usab si Comendador nga sulod sa usa ka semana gikan sa unang pagsumbong ni Pastor Jastiva sa pagsignit sa iyang asawa wala kini makig-communicate sa mga awtoridad. Wala usab sila'y nadawat nga tawag gikan sa mga kidnapper.

Ang patay’ng lawas sa babaye nakit-an sa usa ka Alfonso Jacoma mga 30 metros gikan sa Transcentral Highway.

Si Jacoma residente sa maong lugar nga nanugway og kanding ug nangahoy atol sa iyang pagkakaplag sa babaye nga dali usab niyang gi-report ngadto ni Kagawad Enemedio Nara sa barangay Tabonan. Si Nara maoy mitawag sa kapolisan.

Si Jacoma nagtuo nga dakong bitin ang iyang nakaplagan tungod kay nag-yellow na ang kolor sa lawas niini ug sa dihang iyang gitan-aw, nakit-an niini ang tiil sa usa ka tawo.

Matud pa ni SPO2 Rey Cuyos nga ang lawas sa babaye miaksiyon na og kadugta ug ang panty ug bra sa biktima diha na sa iyang ulohan. Ang ubang mga ebidensiya nga nakuha didto sa crime scene mao ang usa ka parisan nga itom nga sandal, duha ka wala magamit nga condom, tulo ka walay sulod nga botelya sa energy drinks, usa ka kadena sa iro, puwa nga T-shirt nga may desinyo nga gitara nga puti sa atubangan niini, ug putol nga talong nga gisul-oban og condom.

Nasayran nga si Pastor Jastiva mibutyag sa kapolisan nga ang iyang asawang si Judith gidagit sa tulo ka lalaking nagsakay og kotse nga Mitsubishi Lancer kolor blue sa dihang gibabagan ang ilang gisakyang motorsiklo paingon unta silang mopauli sa ilang panimalay sa San Isidro, dakbayan sa Talisay sa dihang naabot sa may Happy Valley. – BANAT NEWS