Giluba sa kainom kritikal

CEBU, Philippines -  Nagpabiling kritikal ang kahimtang sa usa ka lalaki human kini pusila sa iyang kainom didto sa barangay Basak, lungsod sa Catmon niadtong Lunes sa hapon.

Ang biktima mao si Rogelio Pepito, 40 , minyo, nga taga Sitio Hanughug sakop sa nahisgutang barangay, samtang ang suspek mao si Apolonio Lato, 58 anyos, minyo nga silingan ra sa biktima.

Si PO1 Allan Menchavez sa Catmon Police Station mibutyag sa Banat News nga ang biktima ug suspek nag-inom sa wala pa ang hitabo hangtod nga nagkalalis kini   ug mipauli ang biktima sa pinuy-anan niini.

Apan kalit lang kining mibalik ug sa pag-abot niini sa ilang gi-inoman sa walay igong hinungdan gitukmod niini ang suspek.

Gumikan kay wala makabantay, natumba ang suspek ug tungod kay may gitangkil kining kalibre 357 nga revolver, gilanit kini ug giluthang ang biktima.

Nasabak sa ubay-ubay nga bala ang biktima ug gihatod dayon kini ngadto sa   Vicente Sotto Memoriali Medical Center sa dakbayan sa Sugbo.

Samtang ang suspek boluntaryo usab nga mitahan sa iyang kaugalingon ngadto sa kapolisan ug sa pagkakaron nagtingkagol na sa prisohan sa Catmon. - Darrel A. Carumba (BANAT NEWS)