'Killer's nakuha CCTV

CEBU, Philippines - Ang pangulo sa kapulisan sa dakbayan sa Sugbu Sr. Supt. Patrocinio Comendador nibutyag nga nailhan na nila ang tulo ka mga suspetsadong nipusil-patay sa usa ka negosyanteng babaye diha sa dalan Gonzales barangay Camputhaw sa miaging gabii.

Matud pa ni Comendador nailhan ang tulo gumikan sa security camera sa tindahan sa biktimang si Lallain Jore, 34, nga gipauwanan og bala sulod sa iyang convenience store.

Ang hepe sa Fuente Police Station nga si Chief Insp. Arnel Banzon patabangon sa imbestigasyon sa Homicide Section aron mapadali ang pag-ila sa tulo.

Personal nga motibo ang gisusi karon sa kapolisan nga anggulo sa pagpatay sa maong negosyante lakip na ang kalambigitan sa negosyo niini sanglit pipila palang ka adlaw gikatahong mipalit kini og armas.

Sa imbestigasyon sa kapolisan nasayran nga ang mga suspetsadong luwan og motorsiklo mibutho sa tindahan ug mipalit og lima ka botelyang beer ug giinom diha sa gawas.

Dangtan ang pila ka minutos misulod og balik sa tindahan ang duha ug way daghang pangutana gipaulanan og bala si Jore nga nagbarog atubangan sa kahera.

Daling miikyas ang mga suspek sa usa ka kolor pula nga motorsiklo subay sa dalan Escario, ang biktima gidala sa Perpetual Soccuor Hospital apan gideklarar nga dead on arrival.

Nakuha diha sa crime scene ang usa ka kalo; upat ka kabhang sa bala kalibre 45; usa ka buhing bala; usa ka slug ug deformed slug, metal fragments, ug mga botelya sa mga beer nga gipalit ug usa ka plastic bucket color blue nga adunay metal can opener.

 Nasayran usab sa kapolisan base sa gisaysay sa pamilya sa biktima nga aduna kini gikalalis ang biktima sa telepono ug pila lang ka oras nangabot dayon ang mga suspetsado.

Nasayran sad nga tulo ka adlaw na ang nakalabay makatulo magbalik-balik ang mga suspek sa wala pa mahitabo ang pagpatay.  – BANAT NEWS