Tawo Nadakdakan og Bongbong

CEBU, Philippines - Namatay diha-diha ang usa ka trabahante human madakdaki og konkretong bongbong sa usa ka panimalay nga ilang gibungkag kagahapon sa buntag diha sa Remedios Compound barangay Luz ning dakbayan sa Sugbu.

Ang namatay nailang si Jerry Calapaun, 33, taga barangay Paknaan dakbayan sa Mandaue human mapisat ang ulo dihang nahugno ang bongbong sa kongkretong panimalay nga gipanag-iya sa Archdiocese sa Sugbu ug ang caretaker mao ang pamilyang Eddie Urdaneta nga usa ka layko sa Sto. Rosario Church.

Si Nestor Longakit ug ang laing usa ka kaubang trabahante ni Calapuan mitug-an sa Banat News nga kagahapon palang sila sa alas 7 sa buntag gipatrabaho sa magtiayong Urdaneta.

Gikatahong kumpiyansa kaayong giuyog-uyog ni Calapuan ang kongkretong bungbong kansang pundasyon ilaha nang gimaso ug sa kalit lang natumpag kini ngadto sa biktima.

Misuway pa unta og dagan palayo si Calapuan apan naabtan kini sa maong bungbong ug anha mihampak sa iyang ulo ang nahisgutang bungbong.

Gisuwayan unta nila og bunlot ang biktima gikan sa pagkapiit apan wala na kini maglihok ug maginhawa, giingong kalit kaayo ang hitabo ug wala sila magdahom nga maingon niadto kadali ang kamatayon sa ilang kauban.

 Ang barangay tanod sa nahisgutang dapit nga si Robinson Robleca nga gikahinabi sa Banat News mipadayag nga sa wala pa mahitabo ang insidente mitimbaya pa kanila ang namatay dihang ila kining naagian.

Hinuon si Urdaneta nga nahinabi sa mga tigbalita ang nipadayag nga iyang abagahon ang tanang gastuhan sa namatay niyang trabahanti. – BANAT NEWS