Notadong tulisan nadakpan

CEBU, Philippines - Usa ka notadong tulisan kinsa adunay pito ka warrant of arrest sa kasong pagpanulis dinhi sa dakbayan sa Sugbu ug dakbayan sa Talisay nadakpan sa kapolisan didto sa barangay Villanueva, Misamiz Oriental sa miaging Huwebes.

Ang maong tulisan ilado kaayo sa alyas nga Doroteo Imperial apan ang tinuod niyang ngalan mao si Ariel Degamo, nga taga Misamiz Oriental.

Si Sr. Insp. Michael Anthony Bastes, hepe sa Theft and Robbery Section (TRS) sa Cebu City Police Office mibutyag nga si Imperial nadakpan sa kapolisan sa Misamiz human tulisa niini ang RD Pawnshop sa maong lugar.

Matud pa ni Bastes nga ang kauban ni Imperial nga si Angel Aromar namatay sa dihang misukol kini sa mga polis nga midakop kanila.

Si Imperial igo lang natapsingan sa mga bala busa gagmay ra kini og samad nga naangkon.

Gani ang gisakyang motorsiklo nila ni Imperial sa pagpanulis nila sa RD Pawnshop gipanag-iya sa usa ka Turko nga ilang gitulis didto sa Misamiz, sa wala pa nila tulisa ang pawnshop.

Nabawi sa kapolisan gikan kang Imperial ang P15 mil nga cash ingon man ang .45 kalibre nga pistola ug mga bala niini.

Si Imperial wala na makaikyas dihang nakorner kini sa kapolisan sa usa sa mga eskina didto sa Misamiz kay natumba ang motorsiklo nga iyang gisakyan.

Base sa record sa korte , si Imperial adunay 7 ka mga warrant of arrest sa kasong pagpanulis dinhi sa Sugbu.

Pipila sa mga natulis ni Imperial mao ang A1 Financial, East West Bank, Asian Bank, ug Anchor Bank.

Mao usab kini mitulis sa mga Indian National didto sa Talisay pipila na ka tuig ang nakalabay.

Gibutyag ni Bastes nga nakigdugtong sila karon sa kapolisan sa Misamiz aron dad-on nganhi sa Sugbo si Imperial ug paatubangon sa mga kasong gisang-at batok kaniya.

Nasayran gikan sa kapolisan nga gawas sa pagkatulisan, si Imperial giingong usa usab ka gun-for-hire, drug runner, ug gun runner, ug gani gipasanginlan usab kining maoy mipatay sa usa ka magsisibya sa radyo didto sa Misamiz ug mao usab kini miunay og patay sa giilang lider sa Eldefonso Caralde Group diin si Imperial usa usab kini ka sakop sa maong grupo. -  BANAT NEWS