CEBU, Philippines - Usa ka mananagat ang nakit-ang naglutaw sa dagat nga wala nay kinabuhi ug may dakong samad sa dughan nga gituohang tinugsukan sa usa ka matang sa isda hinungdan sa iyang kamatayon diha sa kadagatan sa barangay Candugay lungsod sa Barili niadtong Domingo sa alas 11:00 sa udto.
Patay nang nakit-an mao ang mananagat nga si Alden Sabado Reconalla, 39, nagpuyo sa barangay San Rafael ug usa ka mamamana og isda sa dagat isip iyang pangabuhian.
Matud pa ni PO3 Job Sarvida sa Barili Police dihang nahinabi sa Banat News kauban sa laing upat ka mga mamamanaay niadtong Domingo.
Ang biktima ug duha ka kauban nanglangoy samtang ang usa nila ka kauban nagsakayan ug nagsunod-sunod kanila.
Dangtan ang pipila ka minutos mao nalay nakit-ang milutaw si Reconalla sa dagat ug wala nay kinabuhi hinungdan nga gidali nila kini og tabang ug nakurat nalang sila nga duna kini samad sa dughan.
Ang mga kauban niining mananagat nagduda nga natusok sa isda nga bawo ang biktima nga maoy hinungdan nga nakaangkon kini og samad sa sentro sa iyang dughan.
Hinuon gipa-autopsy pa ang patay’ng lawas sa biktima aron matino kun natusok ba sa isda o dinunggaban o ba kaha naigo sa mismong bala sa pana sa iyang mga kauban ang biktima diha sa dughan nga maoy nakaingon sa iyang kamatayon. - Darel Carumba (BANAT NEWS)