CEBU, Philippines - Tulo ka mga konsehal sa barangay Labangon lakip na sa ilang SK chairman ang nireklamo batok sa ilang barangay kapitan.
Ang mga reklamante mao sila si Konsehal Victor Buendia, Jojo Lozano, Rudy Tabasa ug ang SK chairman nga si Gabriel Ledesma.
Ilang gireklamo si Kapitan Felix Abella tungod kay hangtud karon giingong wala gihapon ihatag ang ilang tag-P10 mil nga extra bonus.
Si Cebu City DILG Director Patricio Gabuya nitakda sa husay sa mga reklamante diha mismo sa barangay hall sa Labangon karong adlawa.
Gitataw hinuon ni Abella nga naa ra sa ilang panudlanan ang kwarta alang sa extra bonus sa hingtungdang mga barangay official.
Apan gipadayag sa kapitan nga dili niya ipa-release ang maong kwarta hangtud nga mopirma ang maong mga opisyal sa ilang resolusyon alang niini.
“Naa man ang kwarta, wala man na ibulsa, papirmahon lang nako sila, og mopirma sila aw ako ning i-release,” sumala ni Abella.
Naglagot ang kapitan sa iyang mga konsehal tungod kay kini wala mopirma sa resolusyon nga naggahin og pundo alang sa ilang extra cash gift.
Apan matud sa usa sa mga reklamante nga si konsehal Buendia nga wala sila mopirma sa resolusyon tungod kay ang kantidad nga gigahin wala matuki sa ilang sesyon.
“Ang unang nasabutan namo sa konseho is P620 million kapin pero ang papirmahan namo kapin na man sa P951 million mao nga natingala mi,” matud ni Buendia.
Nagtuo hinuon si Abella nga nagsugod na og pamolitika ang mga reklamante tungod kay kini giingong mga tigpaluyo ni Jonathan Guardo. - Elly Bolonos (BANAT NEWS)