Namutol og kahoy gipriso

CEBU, Philippines - Gisikop sa kapolisan sa dakbayan sa Talisay ang amahan ug anak kinsa nasakpan sa akto nga namuril sa mga Mahogany nga kahoy sa timberland sa sitio Campinsa, barangay Manipis, dakbayan sa Talisay niadtong Domingo sa buntag.

Ang mga suspetsado mao si Dionesio Abastillas, 50, ug ang anak niining si Ronald, 24, pulos taga Minglanilla .

Si Kapitan Joselito Laurente saa Manipis, kinsa maoy nakasaksi sa mga suspetsadong namutol sa mga Mahogany sa Campinsa maoy mitawag og mga polis aron sa pagpadakop sa amahan ug anak.

Si SPO1 Ricardo Balbutin, PO1 Estephen Sefuesca uban kanila ni PO1 Antonio Abueba ug PO1 Niel Longakit maoy miresponde dayon sa maong alarma.

Si Sefuesca mibutyag sa Banat News nga may upat ka laing kauban ang amahan ug anak apan nakaikyas kini kay mikaratel og panagan pag-abot nila didto sa maong lugar.

Gani sila si Abastillas misuway na unta pag-ikyas apan dihang giwisolan kini sa mga polis mihunong nalang sa kabalaka nga mapusilan sila.

Ang mga opisyal sa barangay Manipis uban sa mga tanod nga gipangunahan ni Laurente mitabang sa mga polis sa pagsikop sa mga suspetsado.

Nasakmit gikan sa mga suspetsado ang 20 ka punoan nga mahogany nga giputol-putol na ug gisulod na sa gahong aron himoong uling, ug 15 ka sakong uling.

Si Sefuesca midugang nga ang nahisgutang lugar usa ka timberland ug ang maong mga kahoy ang gipuril nila ni Abastillas, iya sa Department of Environment and Natural Resources nga gipatanom ngadto sa mga molupyo sa Manipis pipila na ka tuig ang nakalabay.

Ang amahan ug anak nga nagtingkagol karon sa prisohan sa Talisay gipasakahan na og kaso ngadto sa korte. (Brenda D. Batuto)    (BANAT NEWS)