11 ka patrol car para sa lungsod

CEBU, Philippines - Onse ka mga lungsod sa lalawigan sa Sugbo ang makadawat og bag-ong mga   Toyota Hilux Patrol Car nga hinatag gikan sa ulohang buhatan sa Philippine National Police (PNP) sa Camp Crame.

Ang hepe sa kapulisan sa lalawigan sa Sugbu Sr. Supt. Carmelo Valmoria nagkanayon nga ang mahatagan sa Hilux Patrol Car nga nagkantidad og P1.2 milyones matag usa ,kadto lang mga police station sa kalungsoran nga sukad-masukad way patrol car.

Kini mao ang mga lungsod sa Alcantara. Asturias, Boljoon, Compostela, Cordova, Dumanjog, Malabuyoc, Moalboal, Poro, Santa Fe ug Tabuelan.

Ang pagpanghatag sa mga Patrol Car anha ipahigayon sa Headquarters sa Police Regional Office (PRO-7) karong Miyerkules sa buntag nga pagatambungan sa mga opisyal sa PNP, Chief of Police sa kalungsoran ingon man mga lokal nga opisyal.

Subling miawhag si Valmoria ngadto sa iyang mga sakop nga paampingan ang mga sakyanan nga gipanghatag kanila ug gikinahanglang gamiton lang kini sa opisyal nga operasyon ug dili sa mga pribadong lakaw sa mga opisyal sa lungsod.

Gipadayag niini ang iyang kalipay nga ubay-ubay na sa mga police station nga may bag-ong Patrol car na karon aron makatabang kini pag-ayo sa pagpatunhay sa kahapsay ug kalinaw sa probinsya sa Sugbu. (Guam P. Logroño)   (BANAT NEWS)