138 BJMP crew sa city jail gi-drugtest

CEBU, Philippines - Moabot sa 138 ka mga personnel sa Bureau of Jail Management and Penology (BJMP) sa Cebu City Jail lakip na sa Female Dormitory ingon man sa Operation Second Chance ang gipaubos sa kinalit nga drug test kagahapong adlawa.

Kini gawas sa duha usab ka sakop sa Barangay Intelligence Network (BIN) nga gidestino sa City Jail nga gipalakip pagpaubos sa drug test ni Konsehal Agustus Pe Jr.

Ang Cebu City Office for Substance Abuse Prevention (Cosap) nga gipanguluhan ni Felix Jose Lazarte maoy nipahigayon sa random drug test.

Kini subay sa hangyo sa director sa BJMP-7 nga si Chief Supt. Doris Dorigo alang sa maong katuyoan isip kabahin sa kampanya sa bag-ong BJMP Director nga si Rosendo Dial paglimpyo sa ilang ahensya gikan sa ginadiling drugas.

Una nang gipahibawo ni Dial nga iya usab nga ipatuman ang “one strike policy” ngadto sa iyang mga sakop nga adis-adis diin taktakon sa katungdanan kadtong mga BJMP personnel nga mapamatud-ang tigamitan og ginadiling drugas.

Hinuon sa mga BJMP personnel nga gipaubos sa kinalit nga drug test kagahapon, walay bisan usa niini ang napositibo.

Apan niingon si Lazarte nga duna pay pipila ka BJMP personnel nga wala mapaubos sa kinalit nga drug test kagahapon tungod kay dunay opisyal nga lakaw.

“Walay positibo sa ginadiling drugas, pero duna pa hinooy kapin siguro sa 30 ka personnel nga wala mapaubos kagahapon sa drug test,” sumala ni Lazarte.

Ang nahisgutang mga personnel gimanduan nga moadto sa buhatan sa PNP Crime Laboratory karong adlawa aron usab magpa-drug test.

Kahinumduman nga niadtong miaging Biyernes, gipaubos usab sa random drug test ang mga jail warden ug mga personnel sa BJMP sa rehiyon siete. (Elly Bolonos)   (BANAT NEWS)