2 ka polis sa Talisay gikiha sa Ombudsman

CEBU, Philippines - Duha ka polis kinsa nadestino sa Talisay City Police Station (TCPS) ug Regional Mobile Group (RMG)-7 gipasakaan og reklamo ngadto sa Ombudsman-Visayas sa sakop sa tribo nga “Alimaong” kinsa nasikop niadtong Mayo 29, 2008 kay naghupot og armas de fuego nga walay lisensya.

Apan ang maong pasangil ni Pablo Cabigas nga sakop sa nahisgutang indigenous group lig-ong gipanghimakak ni PO3 Arnold Damasco sa TCPS ug PO1 Andy Galorio sa RMG sa ilang joint counter-affidavit nga giduso ngadto sa Ombudsman.

Si Cabigas nagpaila sa iyang kaugalingon nga usa ka sundalo sa katawhan ug Supreme Council of Datus Alimaong (SCODA) kansang panginabuhi mao ang pagpamaligya og mga kahoy nga igsusugnod.

Niadtong Mayo 29, 2008 sa kaadlawon, si Cabigas mipasangil kanila ni Damasco ug Galorio nga illegal nga misaka sa iyang balay diha sa barangay Tabunok, Talisay nga walay search warrant, samtang natulog ang iyang pamilya.

Unya matud pa ni Cabigas nga walay laing nakuha ang maong mga polis gawas sa iyang kuwarta nga nagkantidad og P3,000 uban sa mga sensiyo nga wala na maihap sulod sa ilang balay.

Mipasangil usab kini kang Damasco ug Galorio nga milapas sa Anti-Graft and Corrupt Practices Act nga balaud, kay nangilkil kini kaniya og P10 mil bugti sa iyang kagawasan gikan sa prisohan.

Si Cabigas miinsister nga legal ang iyang pagdala og armas de fuego tungod kay opisyal siya sa SCODA diin may ranggo siya nga “kali” o kon sa kapolisan pa , usa siya ka Colonel o hepe sa ilang tribo.

Gipamatud-an ni Cabigas nga usa siya ka sakop sa Indigenous People and Tribal Soldier kinsa gipanalipdan ubos sa usa ka balaod nga mao ang “Indigenous Right Act of 1997” nga naghatag kaniya og katungod sa paghupot og pagtangkil og armas de fuego.

Apan matud pa ni Damasco ug Galorio nga bisan pa kun sakop si Cabigas sa Alimaong o Holy Warriors nga tribu, ubos sa “penal laws” dili sila gawasnon sa pagtangkil og armas de fuego.

Ang duha ka polis nagkanayon nga samtang nag-roving sila sa palibot sa Tabunok niadtong Mayo 29, 2008 sa kaadlawon, nakit-an nila si Cabigas nga naglakaw nga nagbit-bit og pusil hinungdan nga ila kining gisita ug gidala sa police station aron imbestigahon.  - Brenda D. Batuto (BANAT NEWS)