CEBU, Philippines - Nahawan ang mga dispatser sa kadalanan sa Mandaue human kini panikopa sa task force nga giumol ni Mayor Jonas Cortes.
Apan human kini pahimangnoi sa mayor sa miaging semana, gituohan nga pabugnaw-bugnawon una niini ang hitabo.
Apan may dakong kalagmitan nga mamalik na usab kini karong sunod semana sa panahong malipat ug magpaluyaluya ang mga magbalantay sa trapiko.
Maoy hinungdan nga gitutokan usab kini sa publiko kun unsa kadeterminado ang mga otoridad sa pagpadayon pagsanta sa mga dispatser nga mapunay og sing-al sa daplin sa karsada pagkombinse sa mga pasahero nga mosakay sa jeep aron sila makakuwarta.
Ang pagsikop sa maong mga dispatser nahimo dihang daghang mga drayber nga mireklamo ngadto sa mga otoridad kay gihimo nalang silang gatasan sa maong mga dispatser.
Bisan walay pasaherong mosakay, mangilkil og kuwarta ang maong mga dispatser ngadto sa drayber unya kun dili mohatag ang naulahi, hulgaon nga patyon. - Romeo Limpangog (BANAT NEWS)