Dengue alert sa CHD wa Ikabalaka

CEBU, Philippines - Wala ikalarma ni Konsehal Christopher Alix ang report sa City Health Department labot sa mga kaso sa dengue sa dakbayan.

Base sa labing ulahi nga report sa City Health nga duha ngadto sa tulo ka molupyo sa siyudad ang matakbuyan sa nahisgutang sakit matag adlaw.

Samtang usa sa matag napulo ka dengue victim giingong dili matabang sa mga mananambal nga moresulta sa kamatayon sa biktima.

Nagtuo si Alix nga nasayod na ang mga tawo niini tungod kay giingong dunay mabiktima ug mamatay sa dengue matag tuig.

Ang konsehal nga maoy chairman sa Committee on Health sa City Council gusto nga hatagan og pagtagad sa mga molupyo kun dunay hilantan sa ilang pamilya.

“Ang ako lang nga ang mga tawo masayod sa ilang buhaton kun dunay hilantan sa ilang pamilya ug paryente nga ipa-check dayon,” sumala ni Alix.

Gawas sa Cebu City Medical Center ug sa City Health Department miingon si Alix nga dunay mga satellite laboratory usab nga nagkatag sa siyudad.

Kini giingong libre ug walay bayad alang niadtong gipanghilantan nga mga molupyo sa dakbayan nga magpa-check-up.

Kahinumduman nga ang siyudad dunay dul-an sa dos mil ka kaso sa dengue sa miaging tuig diin kapin usab sa 50 ka mga biktima ang namatay.

Sa unang 38 ka adlaw niining tuiga, ang City Health Department nakatala na og 92 ka dengue cases ug tulo na usab ang namatay sa nahisgutang sakit.

Kini gikatahong pulos mga minor de edad nga naggikan sa barangay Labangon, Lorega San Miguel ug barangay Binaliw.

Gipadayag hinuon ni Alix nga padayong gihingusgan sa dakbayan ang kampanya batok sa dengue ilabi na nga nakasinati na usab karon ang siyudad og mga pag-uwan.

Sa samang higayon giawhag usab sa konsehal ang mga molupyo nga motabang sa ilang kampanya pinaagi sa pagpanglimpyo sa palibot ug pagyabo sa nagpundong tubig. - Elly Bolonos (BANAT NEWS)