Masiao Coordinator patay sa raid

CEBU, Philippines - Namatay ang usa ka masiao coordinator human kini giatake sa iyang sakit dihang gironda sa kapolisan pinasikad sa arrest warrant may labot sa iyang pag-operate sa ilegal nga sugal nga masiao sa lungsod sa Badian niadtong Sabado sa alas 10:30 sa gabii.

Ang namatay mao si Richelo “Boboy” Velos, hingkod ang panuigon, ug nagpuyo sa barangay Malhiao, sakop sa lungsod sa Badian.

Ang kapolisan sa Cebu Provincial Police Office (CPPO) pinangulohan ni Chief Insp. Ma. Elma delos Santos inabagan sa kapolisan sa maong lungsod maoy ni-serve sa warrant batuk kang Velos nga pirmado ni RTC branch 7 Judge Estella Alma Sinco gumikan sa kalapasan sa Akta Republika 9287 kon illegal nga sugal.

Matud ni PO1 Ivan Juarez sa Badian Police Station, subay sa blotter nga gibasehan niini atol sa maong pag-serve sa warrant nagkaguliyang ang mga tawo nga diha sa sulod sa panimalay ni Velos pag-abot sa mga polis ug nag-iyahay kini og sibat pahilayo.

Si Velos nga didto mosekrito og agi sa luyong bahin sa iyang pinuy-anan nitago sa usa ka suok nga lugar.

Subay sa inisyal nga imbestigasyon sa kapolisan kalit lang misinggit si Velos dungan ang pagpangayo og pakitabang sa iyang mga silingan ug sa mga mirespondi nga mga polis tungod kay naglisod kini og ginhawa.

Daling gitabang sa mga polis si Velos ug gikarga dayon nila kini sa ilang patrol car dayong gidala sa Badian District Hospital apan gideklarar ni Dra. Fatima Plaza nga dead on arrival (DOA).

Gituohan nga gi-atake si Velos sa dihang gilusad sa kapolisan ang pag-serve sa warrant niini ug maoy hinungdan sa kamatayon niini.

Atol sa maong pag-serve sa warrant nakasakmit usab ang mga polis og lain laing mga kagamitan sa sugal nga masiao nga nagpasad diha sa sulod sa balay sama sa walo ka pad nga masiao tally sheets nga dunay lain laing kombinasyon sa mga numero, duha ka masiao stabs, lain laing klase sa mga tally sheets, lima ka carbon paper, upat ka ballpen, usa ka stapler, usa ka calculator ug kwarta nga gituohang halin sa sugal nga masiao nga mokantidad og P2,050 apil na ang mga sensilyo.  - BANAT NEWS