Molupyo giawhag manguwarta sa basura

CEBU, Philippines - Gipanghingusgan na ni Mayor Jonas Cortes sa Mandaue City ang pagbahig sa mga basura sa dakbayan pinaagi sa pagbuwag sa malata ug dili malata aron makakuwarta ang mga molupyo pinaagi sa basura.

Matud pa ni Cortes nga diha sa mga dili malata nga basura, makakuwarta ang katawhan kay ikapatimbang man nila kini sama sa lata, sin, puthaw, botelya , plastik ug uban pa.

Matud pa ni Cortes nga kun gamiton lang sa mga molupyo ang ilang utok, dili kini maglisod sa pagkaplag og kuwarta pinaagi sa basura.

Sa laing bahin gawas sa basura, pagardenon usab sa mayor ang mga katawhan sa Mandaue buwahan to dili na kini magpunay og palit og mga utanon diha sa merkado nga mahal kaayo.

Midugang si Cortes nga kun magkugi lang ang mga molupyo, may kuwarta na sa basura, may kuwarta usab gikan sa mga utanon nga anaa sa ilang garden sa palibot sa ilang balay.

Midugang siya nga dali ra kaayo motubo ang mga utanon kun ang mga malata nga basura maoy himoong abuno niini. - Romeo T. Limpangog (BANAT NEWS)