CEBU, Philippines - Wala pa hiilhi sa kapulisan sa lungsod sa Compostela ang usa ka tawong gitigbas patay niadtong miaging kadlawon didto sa barangay Dapdap sa nahisgutang lungsod.
Si PO2 Necavero Balverde sa Compostela Police Station nga gikahinabi sa DYSS Super Radyo ug Banat News nagkanayon nga hangtod kagahapon wala gyud makaila ang tulo ka mga kapitan sa barangay nga ilang giimbitar aron sa pagsil-ing sa maong biktima.
Bisan ang mga molupyo walay gikasulti kabahin sa maong tawo ug wala usab nila hisayri kun kinsay mibuno niini.
Ang biktima kinsa may tinigbasan sa liog nga maoy hinungdan sa hinanali niyang kamatayon, nagsul-ob og itom nga purol, ug puwa nga T-shirt, ug kasarangan ang gidak-on.
Matud pa ni PO2 Balverde nga miawhag na sila sa mga molupyo kansang sakop sa pamilya wala na motungha sa ilaha, sa pagsusi diha sa punerarya sa Compostela pamasin nga ang patay’ng tawo ilaha kining sakop sa panimalay.
Ang biktima napalgan kining nagbuy-od daplin sa dalan sa barangay Dapdap niadtong Biyernes sa alas 2:00 sa kadlawon.
Gisalikway sa kapolisan ang mga pagduda nga gi-salvage ang biktima apan wala nila isalikway ang posibilidad nga malagmit gisuyaan ang biktima, apan ang tinuoray’ng motibo dili pa gayud nila matumbok, ug bisan ang mga mipatay niini dili pa mailhan kay walay nakakita sa maong hitabo.
- Guam P. Logroño (BANAT NEWS)