Fullface helmet idili

CEBU, Philippines - Giawhag ni Bokal Juan Bolo ang tanang lokal nga kagamhanan dinhi sa lalawigan sa Sugbo pagdili sa mga motorista sa pagsul-ob og fullface helmet tungod sa ubay-ubay na nga biktima sa pagpamusil-patay sa mga tawong magsul-ob niini.

Nagtuo si Bolo nga mominus ang gidaghanon sa krimen nga maglambigit sa mga tawong magsul-ob og siradong helmet kun idili na ang pagsul-ob niini.

Labing ulahi nga kaso mao ang pagpatay sa usa ka Victor Verallo, 52, ug sa anak niining si Junrie, 24, ug pagka-angol sa drayber human gipamusil sa nag-fullface helmet duol sa ilang balay sa Gabi, Cordova. Si Mayor Adelino Sitoy mimando na hinuon og subsob nga checkpoint human sa hitabo. - Chester Abadilla (BANAT NEWS)