Teddy mag-bokal sa siksto

CEBU, Philippines - Hayan nga mokandidato si kanhi Mandaue City Mayor Thadeo Ouano alang sa pagka board member nga magrepresentar sa ikaunom nga distrito sa lalawigan sa Sugbo sa 2010 nga eleksiyon.

Si Antero “Jun” Caña, tigpamaba ni Ouano, nagkanayon nga gitan-aw karon ni Ouano ang mga kahigayonan sa pag-kandidato sa pagka-kongresista o pagka board member sa ika-unom nga distrito.

Si Caña miingon nga gitan-aw karon sa kanhi mayor ang duha ka posisyon nga pulos na unya mabakante sa 2010 election sanglit si Kongresista Nerissa Soon-Ruiz ug Provincial Board Member Victor Maambong sa ikaunom nga distrito pulos naman anaa sa ilang katapusang termino.

Dugang pa ni Caña nga si Consolacion Mayor Avelino Gungob   gitan-aw usab nga maoy ikauban ni Ouano alang sa pagkompleto sa slot sa pagka-bokal.

Gipasabot ni Caña nga si Board Member Maambong gitan-aw usab ni Ouano nga kandidato alang sa pagka kongresista human usab matapos ang tulo ka termino sa pagkasakop sa hunta sa lalawigan sa Sugbo. - Romeo T. Limpangog (BANAT NEWS)